اقتباسات أقوال وحكم من كلام مصطفى إبراهيم قمنا بجمعها بكل عناية و نرجو أن تنال اعجابكم. تحتوي الصفحة على 152 قول و اقتباس من كلمات مصطفى إبراهيم.

---

مصطفى إبراهيم

فلان الفلاني اللي كان يومها جنبي ساعة لما بدأوا في ضرب الرصاص فلان الفلاني اللي معرفش اسمه ف دايما بقول يابن عمي وخلاص فلان اللي سابلي بقية ساندويتشه ليلة لما شافني بغنّي و جعان فلان اللي مش فاكرَة غير شكل وشه فلان اللي عداكي جوه الميدان فلان اللي فتشني بالإبتسامه فلان اللي قال هو فعلا هيمشي ؟ فلان اللي قاللي طريق السلامة ساعة لما قولنا زهقنا وهنمشي فلان اللي مرضيش ياخد مني أجرة ساعة لما قلت إني رايح مظاهرة فلان اللي قاللي هيتنحى بكره وهنفرح و نرقص و راح تبقى سهره فلان اللي بالفيسبا طالع و داخل يجيب اللي يتصاب من الضرب جوه فلان اللي ف الضرب عند المداخل يرجّع صحابه.. و يستنى هوّا فلان اللي كان بيناولني القزايز ويقفلها بعد أما اعبيها جاز فلان اللي يشرب ويسألني عايز ؟ فلان اللي كان وشه مليان قزاز فلان اللي وزع عليك بطانية ويسأل “فيه جنبك مكان ع الرصيف ؟" فلان اللي نازل عشان القضية فلان اللي نازل عشان الرغيف فلان اللي مطلعش جوه البرامج وكان بس صوته في قلب الهتاف فلان اللي روح أكل واستحمى فلان اللي ضايع في وسط ال الاف فلان اللي غرقّلي خل الكوفيه و شالني ساعة لما جت طلقه فيا فلان اللي مات يومها تلزمله ديه من ابن الفلاني اللي كل لحمه حاف . مصطفى إبراهيم

---

مصطفى إبراهيم

مين فينا عارفك يا رب... و مين فينا لأ... مين اللى فينا لو قال بحبك... قالها بحق واحد بدقن... بيقول حلال و يقول حرام... وللا فواعلى أرزقى شادد الحزام... وللا خمورجى استسمحك قبل أما نام... وللا عيل لسه معرفش الكلام... وللا حاطلع انا اللى عارفك... انا اللى تايه ف الزحام. مصطفى إبراهيم

---

مصطفى إبراهيم

إخشوشنوا علشان ... المعركة خشنة سدوا الفٌرَج بينكوا.... حاذوا القدم و الكتف ضموا عشان نعمل... من وسطنا جيشنا تار الشهيد ناخده.... قبل أما دمه يجف ما تدّخلوش بينّا خاين عشان نكتر اللى هرب منّا من غيره نبقى اكتر ماتسلّموش ضهركوا غير للى كان جنبكوا مش للى باع عرضكوا بالكرسى للعسكر يا شهدا ماعرفهمش لاكن بقوا إصحابى من كتر ما بشوفهم ف النشرة و الجرانين يا وشوش ما بقابلهمش غير بس ف الميادين مين فيكوا يعرف مين؟ معرفش أساميكوا ياللى على الجبهة ولا مين رمى القنبلة ولا مين جرى وسابها ولا نمرة أم الواد اللى انضرب بالنار ولا إسم شيخنا عماد إلا أما بقى له تار ولا كشف معتقلين إتاخدوا من بينّا ولا مين رسم ع الحيط غير إنه واد منّا معرفش غير دربكم و المشى فى رَكبُكُم و أعيش و اموت وسطكم يا دولة الثوار . مصطفى إبراهيم

---

مصطفى إبراهيم

كما كنتم.. بتتمنوا الحياة تِطْوَل.. عشان فاكرينها جايبة جديد.. كرهتوها.. عشان طلعت ماهيش فارقة.. و هترجعكوا بالتحديد.. كما كنتُم. مصطفى إبراهيم

---

مصطفى إبراهيم

بعد ما قضي نُص المدة .. فتحوا باب زنزانته الصاج .. أخدوا منه كل العهدة .. و شالوا ملفه م الأدراج .. عم محمد مات م الوحدة أول يوم بعد الإفراج . مصطفى إبراهيم

---

مصطفى إبراهيم

أنا لِسة يارب بحطة إيدك عَ المسرح . . لِسة بحآول أستوعب فـ طبيعه الدُور . . معييش النص . . وخآيف بس أتوه وأسرح وقت أما تقرر تكشفني بـ سبُوت النور. مصطفى إبراهيم

---

مصطفى إبراهيم

الصدق الخالص.. خالص..... والكدب المحبوك جداً.... عمرك ما حتعرف تعرف.... الفرق ما بين الإتنين.... إتنين بيلفوا ف دايرة...... و إتقابلوا ف نفس النقطة..... مع إن ف أول لقطة.... كانو ماشيين ف إتجاهين. مصطفى إبراهيم

---

مصطفى إبراهيم

قال الكلام ده ثم حَط الكاس... (الغياب هو الغياب) و الذكرى ف قلوب الصحاب.. أبقى أبقى النهارده معاكم بُكرة مش هَبقى و الدنيا سابقة.. بخطوة كل الناس حتى أنا... قفشت نفسى من يومين بَضْحك... و انتا ما كمّلتش يا صاحبى ف التراب .. أول سَنة و حِلمت بعديها بساعة الصالون.. و بإن عقاربها أبتدت تاكلك .. و إنى براجع م الصور شكلك.. حتى هدومك نِسيت الريحة .. ما اعرفش خايف أصدق .. إن أنا نسيتك و لَّا إنى بُكرة مسيرى هتنسى .. زَيَّك. مصطفى إبراهيم

---

مصطفى إبراهيم

أنا زاهد زيّ زُهد الجوكر ف الكوتشينة أو زُهد الشارع ف الماشيين أنا واحد حيّ مضطر يعيش ف الفاترينة وبيكره جمهور الفتارين. مصطفى إبراهيم

---

مصطفى إبراهيم

ثم دارت اللمونة دورة كاملة......ثم داخت ثم جه إخوانّا و لامونا ثم ان الثورة باخت ثم هما هما برضه اللى باعوا الطول و عرضه يصحوا يتخانقوا و يعارضوا ثم إن الريحة فاحت ثم مش نازلين معاكوا ثم إن الجيش حمونا ثم تاخدوا على قفاكم ثم دارت اللمونة ... ثم قال هنزل لوحدى ثم دقن ف كل حتة ثم يعمل مليونية ثم يمشى الساعة ستة ثم يعمل فيها عنتر ثم ياخد علقة سخنة ثم حيخزوقنا عسكر ثم يطلع من نافوخنا ثم فيه أصلا مؤامرة ثم ناس مش لاقية تاكل ثم تيت الثورة حمرا إحنا مش عايزين مشاكل ثم دارت اللمونة دورة اكبر ...ثم دخنا ثم فجأة الكل يتعب ثم إن الجيش هيقتل ثم إحنا حمارنا يغلب ثم جيم الدومينو يقفل ثم مصر عاوزة زقة ثم ناس ما تقولش لأه يركبوا ع الثورة تانى ثم نخسر.....ثم نكسب . مصطفى إبراهيم