اقتباسات أقوال وحكم من كلام مصطفى إبراهيم قمنا بجمعها بكل عناية و نرجو أن تنال اعجابكم. تحتوي الصفحة على 152 قول و اقتباس من كلمات مصطفى إبراهيم.

---

مصطفى إبراهيم

شيَّع صُحابك من معركة بالليل والصُّبح فرَّج دمُّهم للخلق ولأتوبيسات الناس الرايحة للأشغال زعَّق بصوت رايح وبحشرجة في الحلق واسكت عشان مبقاش.. فاضل كلام يتقال . مصطفى إبراهيم

---

مصطفى إبراهيم

هيحزّموك... زي الجنيه ف الأستك هيسيبولك الفُتات و يبيعولك الأمل ف الإعلانات و الهجرة لبلاد البلاستيك و ف خطبة الجمعة عن الجنة و قُولِة استنى.. فات الكتير هانت خلاص لحد ما خيل الحكومة.. يدوسه عَجَل الميكروباص النظام العالمي بيقتل أوقات كتير .. من غير رصاص الهوا .. هيحَصّل المَيّة اللي بقت ماركات تعددية تعني تعدد الشركات حرية تعني حق فتح القفص .. على الناس اللي ملهاش باب الأخطبوط الرأسمالي اتساب على الناس اللي ملهاش حظ على الناس اللي ملهاش فرص حياتك.. مهمة لبياعين الحلم وفاتك.. مهمة لبياعين القُرَص حسابك حتى في قبرك ..مهم رخصة الجنة مهمة لبياعين الرُخَص و لبياعين الدين و لبياعين الآخرة اللي هتنصف المساكين “العالم بيتطوّر” .. يمشي إسم مسرحية.. أما الحقيقة المضحكة المُبكيّة.. العصاية اللي بتوقّف و بتدوّر.. بتمشي.. من إيد صحاب الجنة.. لصباع صحاب البندقية.. لجيوب صحاب البنك… دم الغلابة بيتحرق ف التانك… شامم ريحتهم و انتا بتفوّل ؟… الغرب هيموّل.. إعمار ِبيار النفط.. لضمان زيادة منسوبات الشفط… و ضمان بقائك عبد متسوّل… يا زميل الكوكب المنكوب.. رَكب الحضارة ماشي بالمقلوب… يا زميل المنطقة المنكوبة… رَكب الحضارة كان لازم له ركوبة… العالم .. بيتطوّر… و انتا شمعة بتتحرق علشان .. برج التجارة ينوّر.. ..العصاية هي هي و شكلها بيتحول العالم بيتغوّل و انتا واقف ف وش الطيارات بالطوبة.. هتعيش حمار و تموت حمار… أخرك تحس بإنتصار لما… بتولّع الأعلام.. و تدوس على صورة إصحاب الدولار و القرار بالجزمة.. القناة .. في نشرة الأخبار.. هيقولوا عنك فوضوي و قاتل.. نفس القناة وقت اللزوم .. هتطلّعك مقتول و بتناضل.. فيه ناس كتيرة أكل عيشها الأزمة.. و ده عيبه.. إن هذا العالم صوته من جيبه و مفيش حقيقة صعب تتأوّل.. و دي ناس تعرف تبيع الآه زي ما بتعرف تبيع اللأ الميديا بائع حق… متجول.. بشرى لابناء العالم التالت م العالم الأول بشرى لابناء العالم الهمجي م العالم الإنسان العالم الحر اللي ما بيضربش ف المليان بس بيجوّع بلاد لحد الموت القاتل الشيك المحترف… ابو طلق من غير صوت فيه الجيوش ما بقوش.. لابسين هدوم ميري و الطيارات …ما بقتش بتوّّزع منشورات اليأس و البنوك ..مش هيسيبوك تتحبس …بالعكس النهارده حاطط إعلانات ع التاكس علشان عليه أقساط بكره تتعلق على هدومك… زي اللعيبة ف الماتشات عالم جديد .. هتخشه بمزاجك قبل ما نزُقّك الكهنة فيه.. لابسين بدل و كرافتات هيأكِّلوك الحقيقة بمعلقة ف بقك و كسر حُقّك ياللي مش عايز عالم ديمقراطي رأسمالي سعيد الشركة فيه… اقوى من الاوطان غضبان ؟…أكيد غضبان مربوط ف ساقية و بتجري في مكانك مسجون و مش عارف وش سجّانك عايز تخبّط كوبايات الحبس ع القضبان لكن هتعمل إيه …معذور أمريكا عملت سجن من غير سور أمريكا رابطة الناس ف بعضيهم أمريكا رابطة الناس و مربطّاك بيهم تدّن في مالطا قد ما هتدّن أمريكا هتفضل بتحب البشر جدا… و بتعمل جِميل فيهم.. فيها الخير يا هل ترى ولّا فيها فلوس؟ أمريكا فيها الحلم و بلادنا فيها كابوس الناس تخاف .. امريكا تحميهم.. الناس تجوع.. امريكا تديهم .. تِكسي بالإيد اليمين اللاجئين …بعد ما إيديها الشمال تعرّيهم شركة بتهِدّ البلاد و شركة تبنيهم شركة بتبيع السلاح و شركة بتطبطب على اللي يموت العالم بيتقسّم دول… العالم بيتقسّم بيوت… العالم بيتقسم لبني آدم و لبنكنوت… مكتوب على شهود البلاد… الممسوحين بأستيكة… أنتَ حر … ما لم تضر… أمريكا. مصطفى إبراهيم

---

مصطفى إبراهيم

بني هذا الوطن و بنوه ما عاد متبّقى شىء تبكوه إذا كان الميزان مقلوب ف يبقى العرض حقه الدم و لو منفعشى حدف الطوب ف تبقى البندقية أهم هتلقوا ع الوطن مكتوب "لا يؤخذ عن طريق الفم" يا إما تشمّروا الاكمام عشان تاخدوه يا إما توطّوا على قدّام عشان تاخدوه بني هذا الوطن ...و بنوه . مصطفى إبراهيم

---

مصطفى إبراهيم

مش ممكن برضه اللي في ضهرك.. يطلع سابقك.. وانت اللي حمار . مصطفى إبراهيم

---

مصطفى إبراهيم

انا اسف جداً جداً علي اول مرة اتحرقت ع الفاضي ومش ويّاكي . مصطفى إبراهيم

---

مصطفى إبراهيم

يا أيها العبد الملول ربك طلع مش زينا وطلع بيرضى مننا .... حتى بأنصاف الحلول . مصطفى إبراهيم

---

مصطفى إبراهيم

الماضي بيمضي حضور يوميا ف الكشوفات مين قال امبارح فات ؟ أنا لسه مقابله إمبارح بيخوّف واحد ماشي م الشارع بعد الجايّ بيقطّم واحد حي و يندّم واحد مات وساعات يوعظ وينظرّ وساعات يضحك ويهزر وساعات واحد مش فاكره و ساعات بيسيب علامات من ييجي يومين بالظبط ونا ماشي خبطت ف مين ؟ فاكر داليا ونرمين ؟ الحاج أبوهم ماشي قوم فجأه لقيتني ف وشه وإزيك ومش إزيك أحوالك؟.. كله تمام الواد محمود بقى زيك طول ماهو قاعد بينام يا عسل …سلملي عليه يوصل.... وبقولك ايه فاضي نتمشى شوية ؟ طبعا ….محسوبك عاطل أنا عارف إن كلامي عمره لا قدم ولا أخر و خايف أطوّل تتأخر لاكن محتاج أتكلم و مش لازم تبقى ترد مسكوا عيال شاربة إمبارح السوق مبقاش ولا بد.... بتشوف إخواتك ؟...لأ شفت الأخبار بالحق ؟ ونطلع من حاجة لحاجة كوباية شاي ع القهوة على ساقع م التلاجه نخطف مشوار ع الكوبري نركب أتوبيس للأخر ونخرّم من قدام وكلام بيجر كلام الراجل ده.. كان ساكت طول عمره لحد مافجأة وبدون ولا أي سوابق جت حادثة و نرمين ماتت بعدين لحقتها الحاجة وداليا اشتغلت في فرنسا و ف ست شهور أو خمسة مبقاش موجود في الشقه غيره ....هوّ و محمود محمود كان لسه صغيّر لاكن فيه شيء اتغير بينام أكتر مابيصحى و أبوه مبقاش بينام يفضل صاحي لأيام طول ماهو صاحي بيتكلم مع ابنه بدال الحاجة اللي ماشافتوش غير ساكت يوميا يفطر نابت من غير ما يغيّر ريقه علشان كات داليا تحبه مع انه مكنش يطيقه البيت قدام الجامع عديني معاك معلش عم حجازي ماعجزش لاكن م اليوم إياه بيخاف ليعدي الشارع دايما بيعدي وسامع صوت الفرملة ف ودانه نرمين قدام التاكسي بتعدي وهوّ مكانه وفجأه مبقتش معاه بعدين مبقاش فيه بنات مش فاكر اخر حاجة من نرمين أو م الدنيا غير ريحة صنف كولونيا بيفكرني بأموات كل الغايبين م الحاضر بيسيبوا دليل إثبات علي إن الماضي بيمضي يوميا ف الكشوفات . مصطفى إبراهيم

---

مصطفى إبراهيم

آخر ما قال ع الموت والدم ف شفايفه: خايفه... ومش خايفه.. يا ريتكوا سامعين هتافكوا كٍيف م انا سامعه يا ريتكوا شايفين يا رفاقة منا شايفه . مصطفى إبراهيم

---

مصطفى إبراهيم

الناس اللي أيامها بتشبه بعضها... وحياتها حاجة بين المسلسل المتعاد و الكوميديا الفارص.. مزيج بين الأمل و الصبر.. حاجة ما بين السواقة و بين ركوب القطر... بين المعافرة و التسليم.. خلطة مابين اَمال بكرة علي أماني عودة امبارح... علي محاولات إنك تعدي من النهاردة سليم... حاجة بتخليهم يقوموا كل يوم الصبح يقاوحوا في الدنيا لمدة يوم كمان... ويقولوا يمكن النهاردة الدنيا تملحنا.. الناس دي هما احنا.. في فيلم طويل.. ابطاله كلهم كومبارس. مصطفى إبراهيم

---

مصطفى إبراهيم

مفيش احساس لحسن الحظ و لسوئه مبيعديش .. مفيش ولا طعم حاجة من اللى بتدوقه مسيره يعيش .. بحلوه و بمره كله بيتسخط لمفيش يا سبحان اللى بيعودنا ع الحاجة فننساها .. و بيخفف كاسات الناس بميه بدال ما يملاها .. عشان طعم اللى فيها يروح .. عشان طعم اللى فيها يجف يقولوا مجازا المجروح اذا خد ع الوجع .. بيخف .... تلف عليه سواقى الكون تدوب اللى فات ف الجاى فسبحانه لما قال منها جعلنا كل شئ حى . مصطفى إبراهيم